मृत भेटिएका सुमो चालकका आफन्त बल्ल शव बुझ्न राजी भए

नमस्ते खोटाङ संवाददाता–
खोटाङ, असोज १२–ऐसेलुखर्क बजारमा मृत फेला परेका रावाबेसी गाउँपालिका–४ डुम्रेधारापानीका ३३ वर्षीय नवराज आचार्यका आफन्तले शव बुझ्न राजी भएका छन् । असोज ११ गते बिहान ऐसेलुखर्कस्थित त्रिभुवन माविको गेट नजिकै बाटोदेखि करिब दुई मिटर तल मृत फेला परेका आचार्य मृत्यु हुनुमा शंका लागेको भन्दै शव बुझ्न मानेका थिएनन् ।
ऐसेलुखर्कस्थित श्याम राजभण्डारीको घरमा असोज १० गते बेलुकी साडे ८ बजेतिर खाना खाएर निस्किएका थिए । उनको मृत्युमा शंका लागेपछि आफन्तले शब बुझ्न इन्कार गरेका थिए । मृतकका आफन्त र प्रहरी बीच घटनाबारे मिहीन अनुसन्धान गर्ने, दोषी पत्ता लगाएर कानुनी कारबाही गर्ने सहमतीपछि शब बुझ्न राजी भएका हुन् । मृतकका आफन्तले घटना शंकास्पद भएको भन्दै जाहरी समेत दिएका छन् ।
आचार्य घोप्टो परेको अवस्थामा मन्टो भाँचिएको, साथमा दुई वटा मुढा, मोबाइलको चार्जर सहित मृत फेला परेका थिए । सहमतीपछि ऐसेलुखर्कस्थित प्राथमिक स्वास्थ्य केन्द्रमा पोष्टमार्टमको तयारी गरिएको ऐसेलुखर्क गाउँपालिका अध्यक्ष गिरेन्द्रबहादुर राईले बताए ।