ब्लड क्यान्सर पीडित बालिकालाई मित्र मिलन स्पोर्टस् क्लवको सहयोग

सविना अछामे–
खोटाङ, साउन २३–ब्लड क्यान्सरबाट पीडित बालिकालाई मित्र मिलन स्पोर्टस् क्लवले आर्थिक सहयोग गरेको छ । साकेला गाउँपालिका–२ रतन्छा जोरधारा छेउ घरभएकी ४ वर्षीया ब्लड क्यान्सर पीडित आकृति राईलाई सहयोग गरेको हो ।

बालिकाको काठमाडौंको महाराजगंजस्थित कान्ति बालअस्पतालमा उपचार भइरहेको छ । क्लवका अध्यक्ष राजेन्द्र राईको पहलमा रकम संकलन गरी तीन लाख रुपैयाँ साउन ११ गते पीडितका बुवा उपदेश राईलाई बुझाइएको क्लवका सदस्य मन्दिप चाम्लिङ राईले बताए । पीडित परिवारको आर्थिक अवस्था कमजोर भएकाले अन्य सहयोग पनि सङ्कलन भइरहेको उनले सुनाए । मित्र मिलन स्पोर्टस् क्लव खेलकूद मात्र नभएर समाज सेवा पनि गर्दै आएको राईले बताए । यो क्लव साकेला गाउँपालिका–२ रतन्छामा स्थापना गरिएको हो ।