आमा–बाउको नाममा पत्रकारिता पुरस्कारका लागि अक्षय कोष

नमस्ते खोटाङ संवाददाता–
धनकुटा, साउन २०–धनकुटा नगरपालिका–५ माथिल्लो कोप्चेका समाजसेवी द्रोर्णप्रसाद गुरागाईले पत्रकार महासंघ धनकुटामार्फत प्रदान गर्ने गरि ‘टिकाहरि–धनञ्जय क्रियाशील पत्रकारिता पुरस्कार’ अक्षय कोष खडा गरिएको छ । उनले दिवंगत माता टिकादेवी र पिता हरि गुराँगाईको स्मृतिमा उक्त पुरस्कारका लागि कोष खडा गरेका हुन् । ।

यो पत्रकारिता पुरस्कारको लागि १ लाख ११ हजार १ सय ११ रुपैयाँको अक्षय कोष रहेको महासंघका अध्यक्ष नगेन्द्र राईले बताए । गुराँगाईले अध्यक्ष राईलाई चेक हस्तान्तर गरेका छन् । गुरागाईले पत्रकारिताको वृद्धि र विकासमा लागि टेवा पुगोस् भन्ने उद्देश्यले अक्षय कोष स्थापना गरेको बताए । पत्रकारिताको माध्यमबाट जनतालाई सुसूचित गराउने कार्यमा योगदान पुर्‍याउने सञ्चारकर्मीलाई कदर स्वरुप बर्सेनि पुरस्कृत गरिने महासंघका सचिव हरिबहादुर लम्जेलले बताए । महासंघ धनकुटा शाखाको हरेक वर्ष पौष–१३ मा पर्ने स्थापना दिवसको अवसरमा उक्त पुरस्कार प्रदान गरिने भएको छ । गुराँगाईले महासंघले सञ्चालन गरेको पत्रकार कल्याणकारी कोषको लागि पनि २५ हजार नगद सहयोग गरेका छन् ।