जेल मुक्त गरिदिने भन्दै ठगी गरेको रकम फिर्ता, जेलमै भएको धन्दामा प्रहरी मौन

खोटाङ, साउन १७—ज्यान मुद्दामा खोटाङ कारागारमा सजाय भोगिरहेका कैदीलाई जेलमुक्त गराइदिने भन्दै असुलेको रकममध्ये केही फिर्ता गरेका छन् । व्यक्ति हत्याको घटनामा कैद सजाय भुक्तान गरिरहेका कटकबहादुर तामाङलाई छुटाइदिने भन्दै निलेन्द्रकुमार कर्णले लिएको दुई लाख ५० हजार रुपैयाँमध्ये एक लाख फिर्ता गरेका हुन् ।
लागूऔषध अपराधमा चार वर्ष जेल बसेर छुटेका कर्णले दुई फरक–फरक व्यक्तिका बैंक खातामा २ लाख ५० हजार रुपैयाँ जम्मा गर्न लगाएपछि २०७९ कात्तिक १७ मा सुनिता अधिकारीको नाममा रहेको सेन्चुरी बैंकको खातामा ५० हजार र तीन महिनापछि माघ २४ मा राजवंशीलाल कर्णको नाममा रहेको राष्ट्रिय वाणिज्य बैंकको खातामा २ लाख रुपैयाँ हालिदिएको कटकमबहादुर तामाङकी श्रीमती जुनकीरीले बताइन् । तीमध्ये एक लाख रुपैयाँ साउन १५ गते खातामा पठाई दिएको सुनाइन् । अन्य रकम तीन दिनभित्र फिर्ता गर्ने कर्णले आफूलाई जानकारी गराएको जुनकीरीले सुनाइन् ।
कर्णले आफूले गृह मन्त्रालयका कर्मचारी चिनेको र तिनीहरूलाई पैसा बुझाएर मान्छे छुटाउँन सकिने भन्दै रकम असुलेका थिए । कर्णले सुनिता र राजवंशीलाल दुवै गृह मन्त्रालयका कर्मचारी रहेको दाबी गरेका थिए । तर, उनीहरु गृहमा कार्यरत छैनन् ।
यसमध्ये सुनितालाई पनि कर्णले ठगेको देखिन्छ । इलामको राँके मूल घर भई हाल काठमाडौं चाबहिलमा बस्ने सुनिताले अवैध हातहतियार र आखेटोपहार मुद्दामा ०७८ जेठ १ गते पक्राउ परेर खोटाङ कारागारमा रहेका दिक्तेल रुपाकोट मझुवागढी नगरपालिका–१५ विजयखर्कका ४५ वर्षीय भिनाजु डम्बरबहादुर कार्कीलाई छुटाइदिने आश्वासनमा एक लाख ९० हजार रुपैयाँ ठगेको देखिन्छ । यसमध्ये साउन १६ गते ५० हजार र १३ दिनअघि ५० हजार रुपैयाँ गरी एक लाख फिर्ता गरेको सुनिताले सुनाइन् । भिनाजु छुटाई दिने आश्वासनमा कर्णले आफ्नो एटीएम कार्ड समेत केही समय चलाएको सुनिताको भनाइ छ  ।
२०६० असोज १५ मा स्थानीय नवराज दाहालको हत्या अभियोगमा तामाङसहित उनका दाजु धनबहादुर र भाइ वीरबहादुर पनि जेल परेका थिए । अदालतले ०६३ फागुन ६ गते फैसला सुनाउँदा उनीहरू थुनामा बसेको एक वर्ष ६ महिना १० दिन भइसकेको थियो । थुनामा बसेको अवधि कटाएर उनीहरूलाई अदालतले १८ वर्ष तीन महिना २० दिन बाँकी जेल भुक्तान गर्ने फैसला सुनायो । कैदी जीवन बिताइरहेका बेला २०६२ असार ५ गते तत्कालीन विद्रोही माओवादीले खोटाङ कारागार आक्रमण गरेका बेला उनीसहितका कैदीबन्दी भागेका थिए । कारागारबाट भगाइएका तीन जना ०७४ चैत ५ गते फेरि अदालतमा हाजिर भए र बाँकी जेल भुक्तानका लागि कारागार चलान भए । कारगारका अनुसार उनीहरूले जेल भुक्तान अवधि पूरा हुने मिति २०९३ असार २४ गते हो । तीन दाजुभाइमध्ये वीरबहादुर भने ०७९ असोज २ मा गृह मन्त्रालयको पत्रानुसार सजाय माफी मिनाहामा छुटिसकेका छन् भने दुई जना अहिले पनि कैद भुक्तानमा छन् । कर्णले यो व्यक्तिगत कारोबारको विषय भएको दाबी गरेका थिए ।
यत्तिको ठगी हुदा समेत प्रहरीले भने कुनै प्रक्रिया बढाएको छैन । कारागारबाटै यस्तो धन्दा हुनु र यस विषयमा प्रहरी बेखबर बन्नुले प्रहरीमाथि पनि प्रश्न उठेको छ । कर्णसंग टेलिफोन संवादहरु हुनु र प्रक्रिया नबढ्नुले प्रहरीमाथि प्रश्न चिन्ह खडा भएको हो । तर जिल्ला प्रहरी कार्यालय खोटाङका प्रवक्ता प्रहरी निरीक्षक बेनु कार्कीले भने कसैले जाहेरी नदिए पनि यो घटनालाई नियाली रहेको बताए ।

(यो समाचार कान्तिपुरबाट साभार गरिएको हो । निलेन्द्रकुमार कर्णको तस्बिर पीडितले उपलब्ध गराएका हुन्)