आत्मदाहको प्रयास गर्ने बास्तोलाको निधन

सविना अछामे–
खोटाङ, चैत १०–आत्मदाहको प्रयास गरेका दिक्तेल रुपाकोट मझुवागढी नगरपालिका–६ नेर्पाका २८ वर्षका भलकाजी बास्तोलाको निधन भएको छ । गत चैत ३ गते राती शरीरमा आगो लगाएर आत्मदाहको प्रयास गरेका बास्तोलाको चैत ९ गते राती जिल्ला अस्पताल खोटाङमा निधन भएको हो ।
किर्तिपुर बर्न अस्पताल काठमाण्डौंले थप उपचार हुन नसक्ने भन्दै डिस्चार्ज दिएपछि बास्तोलालाई फकाएर जिल्ला अस्पताल दिक्तेलमा राखिएको थियो । उनको उपचारको क्रममा राती साडे दुई बजे मृत्यु भएको जिल्ला प्रहरी कार्यालयका प्रहरी नायव उपरीक्षक मन्जिल मुकारुङले बताए । जिल्ला अस्पतालले रेफर गरेपछि घाइते बास्तोलालाई चैत ४ गते किर्तिपुर बर्न अस्पताल काठमाडौं लगिएको थियो तर बास्तोलाको स्वास्थ्य सुधार हुनुको सट्टा झन बिग्रदै गएपछि बर्न अस्पतालले डिस्चार्ज दिएको थियो ।