विभिन्न व्यक्तिबाट सापटी लिएर प्रभु बैंकका शाखा प्रबन्धक सम्पर्क विहीन

सविना अछामे
खोटाङ, चैत ६–प्रभु बैंक दिक्तेल शाखा खोटाङका शाखा प्रबन्धक होमराज खतिवडाले विभिन्न व्यक्तिको रकम लिएर सम्पर्क विहीन भएको गुनासो गरेका छन् । चिनजानका साथीभाइसंग लाखौं पैसा सापटी लिएर फागुन १ गतेदेखि सम्पर्क विहीन भएको गुनासो गरेका हुन् ।
दिक्तेल रुपाकोट मझुवागढी नगरपालिका वडा नं ३ बाम्राङ घर भएका खतिवडाले आफू लगायत थुप्रै व्यक्तिबाट रकम लिएर सम्पर्क विहीन भएको दिक्तेल रुपाकोट मझुवागढी नगरपालिका–२ सोल्माका गंगाबहादुर विश्वकर्माले बताए । खतिवडाले विश्वकर्माबाट केही दिनमा फिर्ता गर्ने गरी ६ लाख सापटी लिएको विश्वकर्माको भनाई छ । खतिवडाले खातावालाकै नाममा चेक काट्न लगाएर बैंकबाट पैसा झिकेको विश्वकर्माले बताए । खतिवडा सम्पर्क विहीन भएपछि कोठा, घर र प्रभु बैंकको प्रदेश कार्यालय बिराटनगरसम्म पुगेर कुरा राखेको विश्वकर्माको गुनासो छ । खतिवडाले करिब एक करोडको हाराहारीमा सापटी लिएर सम्पर्क विहीन भएको उनीहरुले बताएका छन् । खतिवडा सम्पर्क विहीन भएपछि उनको ठाउँमा दिपक खत्रीलाई पठाएको छ ।