सगरमाथा लोकमार्ग अन्तरगत महुरे–सिम्पानी सडक खण्डको उपकरण उठाएर लग्यो

सविना अछामे–
खोटाङ, माघ २४–काम सकिसक्नु पर्ने बेलामा सगरमाथा लोकमार्गको महुरे–सिम्पानी सडक खण्डमा उपयोग गरिरहेको उपकरण उठाएर लगेको छ । निर्माणमा संलग्न भरत कन्ट्रक्सन-सिद्घि शाही जेभीले निर्माणस्थलमा उपयोग गरिरहेको टिपर, क्रसर मेसिन लगायतका उपकरण उठाएर लगेको हो ।
निर्माण कम्पनीले उक्त निर्माण सामग्री अरुकै भाडामा ल्याएको तर भाडा नतिरेपछि सम्वन्धित व्यक्ति नै आएर माघ ४ गते उठाएर लगेको दिक्तेल रुपाकोट मझुवागढी नगरपालिका–१४ बुइपाका वडाअध्यक्ष दिनेश राईले बताए । यसबाहेक निर्माणमा संलग्नले ढुङ्गा, गिटी समेत बेचेर हिँडेको राईले सुनाए । उक्त सडक खण्डमा खटिएका कर्मचारीहरुले होटलमा खाएको तथा कामदारहरुले खाएको खाद्य सामग्रीको समेत पैसा नतिरेकाले समस्या आएको राईको भनाई छ ।
करिब ४१ करोड ५० लाख रूपैयाँको लागतम २०७७ असार २९ गतेभित्र सक्ने गरी उक्त निर्माण कम्पनीले २०७३ असार ३० गने संझौता गरेको थियो । दिक्तेल रुपाकोट मझुवागढी नगरपालिका–१३ नुनथलाको महुरेदेखि हलेसी तुवाचुङ नगरपालिका–११ राजापानीको सिम्पानीसम्म (२२ किलोमिटर) सडकको काम भने करिब ५० प्रतिशत मात्र सम्पन्न भएको गाइघाट–दिक्तेल सडक कार्यालयले जनाएको छ । उक्त सडक खण्डको काम अलपत्र परेको छ ।