सौतेनी आमाको कुटाईबाट बालिका घाइते, काठमाडौंमा उपचार हुदै

नमस्ते खोटाङ संवाददाता–
खोटाङ, पुस १–सौतेनी आमाको कुटाईबाट बालिका गम्भिर घाइते भएकी छन् । दिक्तेल रुपाकोट मझुवागढी नगरपालिका–१ दिक्तेलकी १५ वर्षीया विनिता आचार्य गम्भिर घाइते भएकी हुन् ।
पुस २९ गते दिउसो सौतेनी आमा चन्द्रकला आचार्यले निर्घाट कुटपिट गर्दा देब्रे आँखा र टाउकोमा चोट लागेको छ । उनको जिल्लामा उपचार हुन नसकेपछि काठमाडौं पठाइएको छ । उनको तिलगङ्गा आँखा अस्पतालमा उपचार भइरहेको प्रहरी निरीक्षक किरण राईले बताए ।
विनिताको स्वास्थ्यमा सुधार भइरहेको प्रहरी महिला सेलकी प्रहरी सहायक निरीक्षक सिर्जना राईले बताइन् । ‘तिलगङ्गाले बालिकाको आँखाको सीटी स्क्यानका लागि केएमसी अस्पताल पठाएको थियो ।’ राईले भनिन्–‘सीटीस्क्यानपछि फेरि तिलगङ्गामै ल्याएर उपचार भइरहेको छ ।’
कुटपिटमा संलग्न चन्द्रकलालाई घटनाकै दिन नियन्त्रण लिएर अनुसन्धान बढाइएको प्ररही निरीक्षक राईले बताए । उनलाई मुद्दा चलाउँने तयारी गरिएको छ । ‘पीडकलाई घटनाकै दिन नियन्त्रणमा लिएर अनुसन्धान भइरहेको छ ।’ राईले भने–‘अफिस लाग्ने साथ मुद्दा दायर हुन्छ ।’