बाम्राङ, खाल्ले र लफ्याङबासीलाई लिफ्टिङ प्रविधिको खानेपानी योजना सुरु

सविना अछामे–
खोटाङ, पुस २४–दिक्तेल रुपाकोट मझुवागढी नगरपालिकाका तीन वडालाई खानेपानी पु¥याउँन लिफ्टिङ योजनाको काम सुरु भएको छ । साप्सुखोलाको पानी लिफ्टिङ प्रविधिबाट तानेर नगरपालिकाको वडा नं ३ बाम्राङ, ४ खाल्ले र ५ लफ्याङका करिब दुई हजार बढी घरधुरीलाई पु¥याउँन योजनाको काम सुरु भएको हो ।
संघीय खानेपानी तथा ढल व्यवस्थापन आयोजना मार्फत करिब ५४ करोड ६७ लाख ९० हजार सात सय १६ रुपैयाँको लागतमा उक्त योजना सुरु भएको हो । मृत सञ्जीवनी–सगरमाथा जेभीले २०८२ भदौ ४ गतेसम्म सम्पन्न गर्ने गरी २०७१ साउन २२ गते संझौता गरेको उपभोक्ता समितिका अध्यक्ष ललितकुमार राईले बताए । निर्माण कम्पनीले २०७१ भदौ ५ गतेदेखि नै काम सुरु गरे पनि पुस २३ गते मात्र संविधानसभा सदस्य अर्जुन राईबाट शिलान्यास गरिएको राईले जनाए । उक्त खानेपानी योजनाले बाम्राङ, खाल्ले र लफ्याङका दुई हजार तीन सय ८२ घरधुरीलाई पुग्ने छ ।
यो योजना अन्तरगत ६१ वटा आरभिटी ट्याङ्की, एउटा ट्रिटमेन्ट प्लान, एउटा कार्यालय भवन, एउटा सम्प वेल, सात वटा गार्ड हाउस लगायतको संरचना बन्ने छ । एक सय तीन किलोमिटर वितरण पाइपलाइन र खोलादेखि पाँच हजार एक सय ट्रान्समिसनलाइनको काम हुने अध्यक्ष राईले बताए ।
६ वटा ट्याङकी मार्फत खोलाको पानी प्रतिसेकेण्ड २५ लिटरका दरले देविस्थानमा निकालिने छ । मेवा खोला हाइड्रोपावर(एक मेगावाट क्षमता)को नजिकैबाट लिफ्टिङ योजना सुरु भएको हो । खानेपानीको बड्दो समस्यालाई ध्यानमा राखेर योजना सञ्चालन गरिएको अध्यक्ष राईले जनाए ।