खोटाङका तीन वडा सचिव विरुद्ध विशेष अदालतमा आरोप–पत्र दर्ता

नमस्ते खोटाङ संवाददाता–
काठमाडौं, पुस १२–दिक्तेल रुपाकोट मझुवागढी नगरपालिकाका तीन वडा सचिव विरुद्ध विशेष अदालतमा आरोप–पत्र दर्ता भएको छ । सामाजिक सुरक्षाभत्ता हिनामिना गरेको दाबी सहित अख्तियार दुरुपयोग अनुसन्धान आयोगले पुस ११ गते आरोप–पत्र दायर गरेको हो ।
दिक्तेल रुपाकोट मझुवागढी नगरपालिका–४ खाल्लेका तत्कालीन वडा सचिव मोहनप्रसाद आचार्य, जानुका श्रेष्ठ र पवन श्रेष्ठ विरुद्ध कसुर सजाय तथा विगो असुल गरी माग दाबी सहित आरोप–पत्र दाबी गरेको हो ।
आर्थिक वर्ष २०७४/०७५ र २०७५/७६ मा दोहोरो पर्ने गरी नभएको व्यक्तिको, मृत्यु भइसकेको, अभिलेख नै नभएको र बसाइ सरी सकेकाहरुको नाममा समेत सामाजिक सुरक्षाभत्ता वितरण भएको पाइएकाले आरोप–पत्र दर्ता गरिएको अख्तियारले जनाएको छ ।