बाम्राङ झिसेपुका अग्नि पीडितलाई सहयोग

नमस्ते खोटाङ संवाददाता–
खोटाङ, पुस १०–दिक्तेल रूपाकोट मझुवागढी नगरपालिका ३ बाम्राङ झिसेपुका अग्नि पीडितलाई खोटाङ समाज हङ्कङले स्थापना गरेको प्राकृतिक प्रकोप सहयोग कोषले पुस १० गते आर्थिक सहयोग गरेको छ । पुस ९ गते भएको आगलागीले पीडित भएका मैयाँ श्रेष्ठलाई दश हजार,कर्ण श्रेष्ठ र कृष्ण श्रेष्ठलाई सात÷सात हजार रुपैयाँका दरले सहयोग गरेको हो ।
कोषका अध्यक्ष भोगेन्द्र राईले सहयोग हस्तान्तरण गरेका हुन् । मैयाँ श्रेष्ठको घरमा विद्युत् सर्ट भएर आगलागी हुँदा मैयाँ श्रेष्ठको २७ लाख ४५ हजार, कृष्ण श्रेष्ठको २८ लाख ८३ हजार पाच सय र कर्ण श्रेष्ठको २८ लाख २८ हजारको क्षति भएको प्रहरी नायव उपरीक्षक मन्जिल मुकारुङले बताए ।