गठबन्धन उम्मेद्वार विरुद्ध परेको उम्मेद्वारी फिर्ता

नमस्ते खोटाङ संवाददाता–
खोटाङ, असोज २६–वाम–लोकतान्त्रिक गठबन्धनका उम्मेद्वार विरुद्ध कांग्रेस नेता सर्वधन राई र सुवाशकुमार पोखरेलले हालेको बागी उम्मेद्वारी फिर्ता लिएका छन् । कांग्रेस केन्द्रले जिल्लाको अपमान हुने गरी टिकट दिएको भन्दै बागी हालेको उनीहरुले असोज २६ गते फिर्ता लिएका हुन् ।

गठबन्धनको तर्फबाट प्रतिनिधिसभा सदस्यमा उम्मेद्वारी दिएका माओवादीका रामकुमार राई विरुद्ध पूर्व पर्यटन राज्यमन्त्री सर्वधन राईले उम्मेद्वारी दिएका थिए । गठबन्धनको तर्फबाटै प्रदेश १ खोटाङ (१) बाट उम्मेद्वारी दिएका नेकपा एकीकृत समाजवादी पार्टीका उम्मेद्वार विरबलकाजी राईका विरुद्ध कांग्रेस महाधिवेशन प्रतिनिधि सुवाशकुमार पोखरेलले उम्मेद्वारी दिएका थिए । महाधिवेशन प्रतिनिधि धर्मराज पोखरेलले भने उम्मेद्वारी फिर्ता लिएका छैनन् । उनले प्रदेश १ खोटाङ (क) मै उम्मेद्वारी दिएका हुन् ।
कांग्रेस जिल्ला सचिव ज्ञानेन्द्र जोशीका अनुसार खोटाङ कांग्रेसको जनमत हुदा हुदै पनि केन्द्रले नेकपा एकीकृत समाजवादीको भागमा पारेकाले कांग्रेस जिल्ला समितिले निर्णय गरेरै उम्मेद्वारी दर्ता गरेका थिए ।