मोटरसाइकल दुर्घटनामा खोटाङका राप्रपा नेता जीवनकुमार श्रेष्ठको निधन

सविना अछामे–
खोेटाङ, जेठ २२–जेठ २० गते मोटरसाइकल दुर्घटनामा घाइते भएका राष्ट्रिय प्रजातन्त्र पार्टी खोटाङका नेता जीवनकुमार श्रेष्ठको जेठ २२ गते बिहान निधन भएको छ । दिक्तेलको रत्नपार्कमा जेठ २० गते दिउसो प्रदेश १, ०–५–००१ प ६८३७ नम्बरको मोटर साइकलले ठक्कर दिएर गम्भिर घाइते श्रेष्ठको उपचारका क्रममा काठमाडौंको बासबारीस्थित न्युरो अस्पतालमा निधन भएको हो ।
मोटर साइकल र दिक्तेल रुपाकोट मझुवागढी नगरपालिका–५ लफ्याङका चालक १७ वर्षीय अभिषेख राईलाई प्रहरीले नियन्त्रणमा लिएको छ । राईले आमा विष्णुमाया राईलाई लिएर दिक्तेल बजार आउ“दै गर्दा दिक्तेल बजारको रत्नपार्कस्थित सपिङ कम्प्लेक्स अगाडि दुर्घटना भएको थियो ।
दुर्घटनाकै दिन हेलिकोप्टरमार्फत काठमाडौं लगिएको थियो । श्रेष्ठ लामो समयदेखि जिल्लामा रहेर राप्रपाको राजनीति गर्दै आएका थिए । गत स्थानीय चुनावमा दिक्तेल रुपाकोट मझुवागढी नगरपालिकाको प्रमुखमा उम्मेद्वारी दिएका थिए । श्रेष्ठको शव महाराजगन्जस्थित शिक्षण अस्पतालमा पोष्टमार्टमपछि जेठ २२ गते तीन बजे पशुपति आर्यघाटमा अन्त्यष्टि गरिने मृतकका भाइ विष्णुकुमार श्रेष्ठले बताए ।