साकेला गाउपालिकामा सामाजिक सुरुक्षा भत्ता वितरण

नमस्ते खोटाङ संवाददाता–
खोटाङ, बैशाख २४–बैंङ्किङ प्रणाली मार्फत सामाजिक सुरक्षा भत्ता वितरण गर्दै आएको साकेला गाउँपालिकाले तेश्रो त्रैमासिक किस्ता रकम शिविर मार्फत वितरण सम्पन्न गरेको छ । चालु आर्थिक वर्ष ०७८/०७९ को तेश्रो त्रैमासिक सामाजिक सुरक्षा भत्ता रकम नेपाल एसबिआई बैंकको साकेला शाखा र गाउँपालिकाले पालिकाका सबै वडा र वडा नं. १ को अन्य एक स्थानसहित ६ वटा केन्द्रमा पुगेर भत्ता वितरण गरेको हो ।

गत वैशाख १३ गते २ नं. वडा कार्यालय रतन्छा, १४ गते ३ नं. वडा कार्यालय खिदिमा, १५ गते ४ नं. वडा कार्यालय मात्तिम, १६ गते ५ नं. वडा कार्यालय मात्तिमबिर्ता तथा वैशाख २० गते वडा नं. १ को चण्डेश्वरी आधारभूत विद्यालय डाँडागाउँ र वैशाख २२ गते वडा नं. १ को वडा कार्यालयमा सामाजिक सुरक्षा भत्ता रकम वितरण गरिएको सामाजिक सुरक्षा शाखा प्रमुख डिएम चाम्लिङले जानकारी दिनुभयो ।

वृद्धअवस्था, अशक्तताका कारण बैंक सम्म उपस्थित हुन नसक्ने लाभग्राहीहरुलाई लक्षित गरि गाउँपालिका र बैंकले वडा वडामा शिविर मार्फत भत्ता रकम वितरण गर्दै आएको छ । गाउँपालिका र बैंकको सम्झौता अनुसार वर्षको ३ पटक गाउँगाउँमा शिविर मार्फत भत्ता वितरण गरिनेछ । यस पटकको शिविरबाट ४०२ जना अशक्त अवस्थाका वृद्धवृद्धाले सेवा लिएका छन् भने ४५ लाख ३१ हजार रुपैंया रकम उनिहरुले गाउँमै बुझेका छन् ।

१२ सय ७ जना लाभग्राही रहेको साकेला गाउँपालिकामा तेश्रो किस्ता बापत १ करोड १३ लाख रुपैया रकम निकासा भएको थियो । भुक्तानी शिविरका लागि नेपाल एसबिआई बैंकका शाखा प्रबन्धक असिम इङ्नाम, प्रमुख प्रशासकीय अधिकृत महेश राई लगायत सामाजिक सुरक्षा शाखाका कर्मचारी आफै शिविरस्थल पुगेर भत्ता वितरण गरेका थिए ।