सुमो दुर्घटना अपडेट : घाइते ४ मध्ये एकको अवस्था गम्भिर, अन्यको सुधारोन्मुख, एक डिस्चार्ज

नमस्ते खोटाङ संवाददाता–
खोटाङ, कात्तिक २–सुमो दुर्घटनामा परी घाइते भएकामध्ये दिक्तेल रूपाकोट मझुवागढी नगरपालिका–३ बाम्राङकी ३८ वर्षीया सम्झना राईको अवस्था गम्भिर रहेको प्रहरीले जनाएको छ । काठमाडौंबाट खोटाङ आउदै गरेको को १ ज २९७६ नम्बरको सुमो सिन्धुली फिक्कल गाउँपालिका–६ नागथानस्थित मध्यपहाडी लोकमार्गबाट कात्तिक १ गते विहान २ः३० बजे सुनकोशीमा खस्दा घाइते भएका ४ मध्ये उनको अवस्था गम्भिर भएको हो ।
उनको टिचिङ हस्पिटल काठमाडौंको आइसियुमा राखेर उपचार भइरहेको जिल्ला प्रहरी कार्यालय खोटाङका सूचना अधिकारी निराजन बस्नेतले बताए । उक्त दुर्घटनामै घाइते उनकी १३ वर्षीय छोरी सिवानीको पनि टिचिङमै उपचार भइरहेको छ । उनको अवस्था भने सामान्य बनेको छ । गाडी चालक ओखलढुङ्गा सिद्धिचरण नगरपालिका–२ का २९ वर्षीय आशिष विश्वकर्माको अन्नपूर्ण अस्पताल काठमाडौंमा आइसियुमा राखेर उपचार भइरहेको छ । उनको अवस्था सुधार हुदै गएको प्रहरीले जनाएको छ । त्यस्तै उक्त दुर्घटनामै घाइते भएका खोटेहाङ गाउँपालिका–६ इन्द्रेणीपोखरीका घर भइ दिक्तेल बस्दै आएका १४ वर्षीय अंकित विश्वकर्माको भने उपचारपछि डिस्चार्ज भइरहेको जिल्ला प्रहरीले प्रहरीले जनाएको छ ।
उक्त दुर्घटनामा ३ जनाको मृत्यु, ३ जना बेपत्ता र ४ जना घाइते भएका छन् । दुर्घटनामा दिक्तेल रूपाकोट मझुवागढी नगरपालिका–५ लफ्याङ दुभेकी २१ वर्षीया युपना राई, १९ वर्षीया काब्या राई र खोटेहाङ गाउँपालिका–६ इन्द्रेणीपोखरी घर भइ दिक्तेल बस्दै आएकी १६ वर्षीया स्वस्तिका विश्वकर्माको मृत्यु भएको छ । लफ्याङकै ३० हरि पुर्कोटी, २६ रोसन मुग्राती र २२ वर्षीया अप्सरा राई बेपत्ता छन् । उनीहरूको कात्तिक १ गते साँझ ७ बजेसम्म फेला नपरेपछि खोजी थाँति राखिएको र कात्तिक २ गते खोजी सुरु गर्ने तयारी भइरहेको प्रहरीले जनाएको छ ।
चालक निदाएर दुर्घटना भएको हुन सक्ने प्रहरीको अनुमान छ । उक्त गाडी राति ११ बजे काठमाडौंबाट खोटाङतर्फ हिडेको प्रहरीले जनाएको छ । अनिदोका कारण दुर्घटना हुने गरेकाले यस्तो अवस्थामा गाडी चलाउन प्रहरीले रोक लगाएको छ ।