अनुत्पादक क्षेत्रमा लगानी गरेर संरचना बनाइएको भन्दै आलोचना (भिडियो सहित)

नमस्ते खोटाङ संवाददाता–
खोटाङ, भदौ १०–अनुत्पादक क्षेत्रमा लगानी गरेर दिक्तेल रूपाकोट मझुवागढी नगरपालिकाले धार्मिक पर्यटकीय बुद्धेश्वर गुफा नजिकै संरचना बनाएको भन्दै आलोचना सुरु भएको छ । धार्मिक तथा पर्यटकीय क्षेत्रको संरक्षण गर्नु पर्नेमा त्यसलाई असर गर्ने गरी संरचना बनाएर अनुत्पादक क्षेत्रमा लगानी गरेको भन्दै आलोचना सुरु भएको हो ।
अघिल्लो स्थानीय सरकारले विभिन्न ठाउँमा टावर निर्माण गरेको, आँखा पोखरी लगायतका अन्य अनुत्पादक क्षेत्रमा लगानी गरेको र वर्तमान स्थानीय सरकारले पनि बुद्धेश्वर गुफा अगाडि टावर लगायतको संरचना निर्माण गरेको खोटाङ उद्योग वाणिज्य संघका पूर्वअध्यक्ष राजु लयालुले बताए । मझुवागढी क्षेत्र धार्मिक पर्यटकीय क्षेत्र भएकाले संवेदनशील भएर संरचना बनाउँनु पर्ने लयालुको भनाई छ । यो ठाउँमा सिमेन्टको संरचना निर्माण गर्न नहुने खोटाङ उद्योग वाणिज्य संघका अध्यक्ष राजन अचार्यले बताए ।
दिक्तेल रूपाकोट मझुवागढी नगरपालिकाका प्रमुख तीर्थराज भट्टराईले भने पर्यटन प्रबद्र्धन गर्ने उद्देश्यले पर्यटकलाई आकर्षित गर्न उक्त संरचना बनाइएको बताएका छन् ।
यो योजना प्रदेश समपुरक अनुदान अन्तरगत कोसी प्रदेशको ६५ प्रतिशत र नगरपालिकाको ३५ प्रतिशत गरी एक करोड ३६ लाख ८४ हजार रूपैयाँ विनियोजित रकममध्ये ९६ लाख ६६ हजार दुई सय ८९ रूपैयाँको लागतमा ठेक्का मार्फत गरिएको हो । २०८१ ऋसार २४ गतेसम्म सक्ने गरी मादी आर के डी कन्स्ट्रक्सन प्रालि इटहरीले २०८० माघ ९ गते संझौता गरेको थियो । यो योजनाको ७५ लाख ७ हजार ४ सय ९६ रूपैयाँ भुक्तानी भएको दिक्तेल रूपाकोट मझुवागढी नगरपालिकाका सूचना अधिकारी मोहनकुमार भट्टराईले बताए । यो योजनाका लागि चालु आर्थिक वर्ष पनि कोसी प्रदेशले एक करोड रकम विनियोजन गरेको भट्टराईले बताए ।